زومار آيدا،
اوزوم فصلينده!
اورييم،
چليك له پاركلاري گزير؛
و اؤتن عومرون دوشونجه سي،
گؤزومون اؤنونده ياللي گئدير:
" آنلاشيلمادي سئوگي،
يانليش ياتاقلاردا!
نه منيم رويالاريمدا چيچك لريم ساچيما دوزولدو،
نه سنين پؤرنولارين تنيم ده گرچكله شدي!
نه هئچ ايكي اورك بيرله شدي!
يانليش ياتاقلاردا،
قوسولدوم دونيايا دفعه لرجه!
......."
.......
زومار آيدا،
اوزوم فصلينده،
پاركلاري گزير اورييم،
چئورمده كپنك لر اوچور؛
و بيرآز او تايدا؛
تكجه اؤنريم شطرنج يولداشي دير!
من ايسه،
ياناقلاريم گنج بير اوغلانين سئوگي آرتيغيندان پوتله نير!
چليكله اليم اورتاسيندا ازيلن چيچكلر،
آنلاشيلمير گنج سئوگيله!
ساچيم بنزه مير او ساچلارا....!
......
يوسيف خلعتي باشيما چكيلسيدي بير،
گنج اوغلانين سئوگي سينده،
قارا ساققاللارين قدريني،
من بيلرديم.....
زومار آيدا،
اوزوم فصلينده!
مين بير باجالي اوتاغين ايچينده اسيرم!
منه بير يول گؤستر....
بو اوتاغدا،
بو اؤلكه ده،
هر باجادان آرزيلاريما باخسام سؤز اولور!
سئوسم, سؤز اولور!
سئويلسم، سؤز اولور!
سئويشسم، سؤز اولور!
سئويشمه سم ده، سؤز اولور!
قادين كيمي اينجه؛ يا اركك كيمي گوبود؛
بو اؤلكه ده شاعير اولسامدا ، سؤز اولور!
اويرتمن ده اولسام دا بئله!
بو قارا اوتاقدان يورولموشام!
بو قارا اؤلكه دن!
قاچماق ايسته ييرم!
.........
سن هارالارداسان؟
هانسي باجادان باخسام گؤروشرسن؟
بابالنگ درازين كؤلگه لرينده مي سن؟
يا قارا دنيز ساحيلينده، موتلو قيزلارين باغريندا؟
سني هانسي باجادان باخسام گؤررم؟
آرزيلاريم بهانه دير سئوگيليم!
من، مني تاپماق ايسته ييرم!
آمما بو اؤلكه ده هر كيم اولسام،
سونوندا فاحشه دئيه جكلر!
بو اؤلكه ده قادين قهبه دير!
آلقيشلايان اللرين آداملاري،
آغزيلارينا توپورجك دولدوروبلار!
"آلقيشلار اويرتمن خانيم".....!
آرخاسيندا تورپورجك!
"آلقيشلار شاعيره خانيم".....!
آرخاسيندا تورپورجك!
"آلقيشلار ايدمانچي قادين"....!
آرخاسيندا توپورجك!
"آلقيشلار اركك كيمي غئيرتلي قيز"
آرخسيندا توپورجك!
بو اؤلكه ده هر باجادا آرزيلاريم ياغيرسا،
يالان آلقيشلار دا ياغير ،
تورپورجك لرده ياغير،
بوردا اللري اته چاتمييان پيشيك لر پوفولدورلر!
.......
هئييييي....!
اي تانيماديغيم سن،
گؤرمه دييم سن،
هارداسان؟
سن هانسي باجادان مني دينديره جكسن؟
نه دئيه جكسن هله؟
خانيم آدين ندير؟
"حورمتلي قادين ايشين ندير؟
پئشه ن ندير؟
.....
و آرخاسيندا،
كؤپه يين قيزي اوتور ائوينده !
...
من من اولاندا،
گؤونمير آرتيق هئچ اورك منه!
يئل قارا لئچه ييمه توخونسا،
بير اركك باغري سئوه جك مني!
بوردا گلين دونو هر قيزا ياراشمير!
بوردا هر بي گلين يئلينكاسي،
صاحابسيز عروسك لرين دونون،
قارا آغاجلار آلتيندا،
پالچيخلير!
بوردا ان تانيش گولوشلر بختيمي قارادير!
.....
سن گل آنجاق!
تانيش ديللرده گلمه سن ده،
يابانچي اؤلكه دن گل!
گل بونلاري دئمه!
گل دئنه:
قيزيم آرزين ندير؟
من ده، باجالارين بيرندن،
سني، بابالنگ درازين كؤلگه سينده سئويم،
اللرين داها يئكه اولسا،
داها يوكسه ليم،
بلكه يارالي آياغيم گينه توپلا باريشا!
.....
هئيييي......
بيليرم گلمه يه جكسن!
و جودي آبوت ساده جه بير كارتون دور....
........
گئديرم!
گئديرم پالچيخلي دونومو قارا دنيزده يويام!
دئييرلر او دنيزلرين سويو، موتلو قيزلارين نفسيله قوتسال اولوب!
من بو اؤلكه ده نيسگيللريمي هر باجادان يودوم داها كيرلندي!
و سونرا اليم اوزولركن، سوسقونلوغومدا فاحشه ليك حيسي دويولدو!
سن كي گلميه جكسن هئچ باجادان،
پس من گئديرم!
آخي بوردا آي سئويشمير تنيمله،
يئل توخونمور ساچيما،
بوردا من ياساغام اؤلكه مه،
اؤلكه م ايسه منه!
گئديرم ساچلاريمي يئل ايله باريشديرام!
قوي قارا آغاجلار هئي دانيشسين،
من گئديرم بير دؤنه گولم،
بلكه............!!!!!
25/06/1393
اوتانيرام سندن؛
اوريينده, داش اوسته اوتورموش بير قوناق كيمي!
باخ:
اورييمين ال قولو كؤشويوب!!
.....
.....
گئجه قالماغا گلمه ميشم؛
آخي يالنيزليقلاريم ائوده گؤزلويور مني.
.......
گل بير چايليق صحبتله,
آچ دوداغيمين دونون,
سني سئويرم دئييم, گئديم......
30/05/1393
خيامدا,
اته يي گوللو دونا,
بيرده اورييمه,
گؤروشونو سؤز وئرميشديم!
......
سن گئدن دن بري,
اورييمه اركيم چاتيب,
آغزيندان ووردوم!
........
آنجاق,
هردن بير كونلومون قاپيسينا بويلانان,
كؤرپه دويغولو,
اته يي گوللو دونا,
اوزوم كسمير؛
اورييمدن گلمير؛
آخي,
دستامازلي اللرينه تاماه سالميشدي!
اورييمين قانينا بولاشسا,
سونوندا,
قهبه لر الينه دوشه جه ييني,
هئچ بيلمير هله,
اته يي گوللو دون,
خيامدا......
23/05/1393
داها هئچ كس "او" اولمادي!
حتي اؤزو!
و حتي ايلكيندن ده "او" , "او" دئييلميش!
.........
بير گؤزگو تانرينين اؤنونده,
گؤزومو قاماشديريب ,
كؤنلومو آزديرميشدي؛
قيسسا بير چاغدا
او گؤزلرده!
.....
ايلكيندن ده "او" , "او" دئييلميش!
.....
و من
....
آزميشام تؤز باسيلميش آينالاردا!
گؤزومون الي قوپوب تانريدان!
سرگردان,
بير ايشيق گزيرم؛
قارا آينالاردا...
....
و نم هارالاردان,
بير سس قولاغيمدا ميزيلدايير:
"گئري دؤنسن سه,
تانري آرخان دا اولاجاق!
كسين "او", "او" اولاجاق!"
10/05/1393