سورماسان دا هارا گئدير آياغيم/ سني گزيب, آختارمايا گئده جم!
حسرت قوسسا اللريمين اوره يي/ سني يالقيز اللريمدن بيراخيب,
اؤز گتيريب سنه, سندن كئچه جم! / روحون گزن شهرلره كؤچه جم!
دونوب اوچدو هانسي آللاه سسينه؟/ گؤزلريمده داليب قالان اوريين!
دادمادي دوداغين يانقي چاغيندا / مؤوون مينلر داماريندا شرابين!
ايچيلمه ميش سنه قاليب گله جه م / اؤز گتيريب سنه, سندن كئچه جم.
روحون بئله يئيين دولانان چاغدا/ آغير ائتسه كؤلگه م آياقلاريني,
سهمان, سهمان شهر بيجاغلارينادا / ايزلريندن ايزلييني تاپاجام!
گيزلي گيزلي بيجاقلاردا سئوه جم/ اؤز گتيريب سنه سندن كئچه جم.
گرچكله شن آرزيلاريندان دؤندوب/ لوت سئوگيمي ياشماقلارا بوروسن,
بئينينين بيلگيه حسرت چاغيندا / تؤز قونولموش بير كيتابا چئويرسن,
اوخونماميش سنه دوغرو گله جم / اؤز گتيريب سنه, سندن كئچه جم.
يوللاريمين شيطان سئون چاغلاري / گؤزلرين تؤولاسا آياقلاريمي
روحانا باخيب دا قيبله ائدجم/ بير ركعت توبه ده قيريب كئچه جم
بير ركعت حاجت ده قيليب گله جم/ اؤز گتيريب سنه, سندن گئچه جم!
گئج اولاجاق دئييب, سوسداتماز مني / زامانه نين آغير ثانيه لري
اللرين داريخماز بو كؤچمه ييمدن / روحونون اللري اللريمديكن
اللريندن كيپ كيپ توتوب گله جم / سني سئويب, سنه اؤلوب گله جم/
اؤز گتيريب سنه, سندن كئچه جم!
آياق يالين بير گئجه!
شيطانين باشماغي, سوخولور گؤزلريمين آياغينا!
دين سيز دين سيز گزير اوره يينين كوچه لرين!
آديم آديم كؤورلدير ازديگي توپراغي!
آلو آلو قيزديرير عشقين اوجاغين!
پاققيلدادييب, قاينادير محبت چاناغين!
كيلو كيلو اولچور جوشولان عشقين عوصيانين!
اوووج اووج ايچير دوم دورو دويغولاري!
قارين قارين قوسور قابينا!
كؤورلن اوريينده كي قوخو ايندي عوصيان ايزيدير!
گؤزلريم ائرمني دير سانكي,
اوره يين قاراباغ!
وجب وجب آياقلير, دامار دامار سئوگي ني!
آلوو آلوو تالانلير تانريني جهنمه!
تاريخ تاريخ استيعمار ائدير دوشونجه ني!
......
شيطان باشماقلارينين آرخاسيندان,
گوزلريم اوريينله,
دوداق دوداق اوپوشوب سه ده بئله, نفس نفس بوغوور نفسيني!
ديليم قولاقلاريني شيرين شيرين تومارلاسا دا بئله,
سؤزوم كلمه كلمه دوغرور جييه ريني!
سيخير ايندي گؤزلريمي!
هوس باشماغين دارليغي!
بو گئجه باغيشلسا اوريين گؤزلريمي!
صاباح يئتيشركن آياق يالين ايشيغين آلاجام,
گؤزلريمين!
آياق يالين جنته دوغرو,
سهمان سهمان اوريين سويوياركن,
يئيين يئيين سوندورجم باخيشلاريمي!
س.ي 18/12/92
بير گون واريدي,
بير گون يوخودو,
آللاهدان سونرا, بير كؤز واريدي!
بير اوجاق؛
اونونده سن؛
بويرونده من؛
آلووو سن, كؤزوده من!
بير گون واريدي,
بير گون يوخودو,
آللاهدان سونرا, بير گؤز واريدي!
شرابي سن,
خوماري من!
قيزيشيردي سئوگي,
سس سيز؛
خبر سيز؛
سن يازيردين حايات سناريوسون,
من بوسوردوم سئوگي چاشماسين!
سن يازيردين آستا آستا,
من چاباليرديم كتدي كتدي!
بيچيرديم ماهنيلارين توپلاريندان,
سئودييم پارچالارين,
سئوگي تنينه لاييق ياراشديرام بير پالتار,
سن بيتيرينجه سناريونو, داريخمييم دييه!
ماهنيلارين عطف پارچالاريندان,
مينجيق بورج آليرديم پالتاريما!
رقص ائدر كن, پاريلداسين سئوگي!
بزيرديم اته يين, زيرنا قووواللا!
ياللي گئدركن موتلو ائتسين اورييني!
داها گؤزل اولسون دييه,
پالتارين دوشونده,
گؤزلريمدن بير شكيل چكديم!
اورييمي قيرديم بوتون دامارلاردا! تاج اولسون تنينه!
سن!
جومموشدون سناريوندا!
دويوردو سني هر شئي,
اوجاق, كؤز, شراب, گؤز, من
آللاه دان سونرا گؤر نه واريميش!
بير اليمده سئوگي, بير اليمده پالتار,
ميزيلديردي دواقلارين بير مئلودي!
تانيش, آنجاق حوزونلو!
اليم دولو!
دوداقلاريم گولوشلو!
يومدوم گؤزلريمي!
ميزلداديم سنله برابر
هيم....هيم. ..ميمم
مممم
آيريليق
آير...
مم
..
بو مئلودي نه گؤزل! آمما ياراشماسين ناغيليميزا كئشكه!
ديسكينديم سس سيزليكدن!
آچينجا گؤزلريمي!
سوسموشدو دوداقلارين!
اسيردي بير سويوق هاوا, باجانين هاراسيندان؟
سن بوغولموشدون سناريونون سون ديالوگوند!
آيريليق سناريوسو!
سئوگيمين عريان تني ,
اولدو قوجاغيمدا !
ياسلي قالدي هونر !
ماهني,
شعر,
رقص,
زيرنا؛ قوووال!
و
من!
سيزيلدير ايندي سوموكلريم!
گيزيلدير اتلريم,
اومموشام دئييرلر!
پوتلنميش سئوگي نين قوخوسو,
سوخولدو كوچه باجادان, سوموكلريمين بئينينه!
اوشاقليقدا,
چوچوندورون قوخوسو بورنوما سوخولان تك!
نيسگيلين غضبي,
آتامين جيبي بوش واختيندا كي حيرس كيمي,
اومدوردو معده مي!
اومدورو اورييمي!
سيزيلدير سموكلريم,
گيزيلدير اتلريم!
ايچيرم تورشاميش سئوگيمين جسدين!
بيتيرم بو آغريني!
ايچيرم شرفينه يوخ! شرفسيزلييغينين ساغليغينا!
...
آنجاق
كئشكه آچاردين بير آلا گؤزلريني,
دئيردين: كات,..... بيتدي آرتيق سناريو....! گل بير چاي ايچك, گل اوخو آلما ماهني سين دينجلسين دوشونجه لريم!
"آلما وئرسم آلمازسان,
سن آلمادان قالمازسان!
هانسي باغين گولوسن,
آي بالام,
اييله ديكجه سولمازسان"
سميه يولقونلو
09/11/92
آرديني اوخو
يئتيم خاطيره لر:
سئوگيليم؛
پاييزدان خبرين وارمي؟
ايستي نين دونو آچيليب,
دامير يئرين كؤكونه,
اوشويور شهر!
اوشويور اورمو!
پاييزدان خبرين وارمي؟
يوخسا آياغين ايليشيب قويروق دوغان سيجاق آيين سئوگي آلووونا؟!
اورمونون بير گوشه سينده, سئوگي لر, نيفرت لر, ساواشلار و باريشلار دوغولار كن,
سن ايسه,
ياشاييش بيجاغيندا, وحشي گؤزلو بير قيزين محبتين بوسوب,
چاباليردي دوشونجه لرين,
تر توكوردو بئينين,
دوغوردو وحشي سئوگي ني, قويروق دوغان آيين سيجاق آلوووندا!
و دوشونجه لرين سئوگييه بويلاناركن,
يوخسوز گونلري هئچ دويمادين....!!
آنجاق گونلردي كي, بوردا پاييز دولانير!
يوخسوز گونلر!
حسرتين سازاق يئلي, كوچه لرده گزر كن,
آخير كوچه لرين اينتيظار گؤزو,
دادير يانقي آغزي,
زهر نيسگيلين دولو دولچاسين,
بير قورتوم گؤزلريندن ايچمك هوسينده!
سئوگيليم؛
قارا تله سيردي شوخلوخلارين,
جؤشوب, خاطيره لرين بارداغينا داشماق ايسته ييردي,
دون گئجه, آذر اون دوردو بيتيرركن, گيزليجه, سحره ياخين, ياغدي قار, اورمودا!
ايندي,
قار گولله سي, كوسوب,
اويانيب كؤرپه چيلله م,
شيلتاق ائلير شوخلوخسوز بارداقلارين بوشلوغوندا,
بير جام موتلو نفس لريندن,
دولدور گئجه مين بارداغين,
اووودوم كؤرپه بالامي!
سئوگيليم؛
جمعه ائرته لرده, دوم دورو هاوالارين باغري سن سيز,
سنين باغرين من سيز,
داريخير زامان,
يئتيم قاليب خاطيره لر!
سئوگيليم؛
دوشونجه لرين سئوگييه بويلاناركن,
يوخسوز پاييزي دويمادين هئچ!
باري,
بير اووج اللريندن, دولدور خاطيره لرين اته يين,
اؤزگه باخيشلارين سويوق هاواسيندا گزيب, آجاركن,
هردن بير,
بيرين آتيم اورييمين آغزينا, توتسون مني, سن گلينجه!
سئوگيليم؛
گلسن سه, گولوشلريندن آخيت جانسيز خاطيره لرين سويوق دامارينا!
گلمه سن, چيلله بويويور, بير تئل ساچيندان, گؤنده ر بوغازيما!
سميه يولقونلو
15/09/92
ائركك تاريخين ياتاغيندا!
و نطفه لر ياراناركن,
ايگيد دوغولسون دييه,...
ايالت دوداقلاريلا, قانيما يئريحليراورمو!
پارچالير يولجو سينه مي,
يولچولارين داشلاري!!
قانيير اورگييم....!
قوي تيكه سي سندن اولسون دييه,
ايچير بويلو اورمو,
قيپ قيرميزي قانيمي!
سينير اولسون ايالت!!
سميه يولقونلو
10/08/92
"Boylu urmu"
Qadın olub urmu
Erkək tarixin yatağında
Və nütfələr yaranarkən
Igid doğulsun diyə
əyalət dodaqlarıla, qanıma yerihlir urmu
parçalır yolcu sinəmi
yolçuların daşları
qanıyır ürəgim
qoy tikəsi səndən olsun diyə
içir boylu urmu
qıp qırmızı qanımı
sinir olsun əyalət
