توپراغي قؤخولاركن,

توپراغا قويلانميش اللريمه چاتدين!

من ايسه بو چاتيشي سئوركن,

قيزيل اورگيين دويدوم!

 

آسدين اونو بوينوما؛

سيخدي بوغازيمي؛

قورودو ديليم,

دينه بيلمه ديم!

آنجاق سن ديندين؛

هئچ بوغازيمي دويمادان؛

ديندين, دانيشدين؛

چاتديغين مقصدين يوللاريندان؛

توپراقدان؛

اللريمدن؛

بيرآز داها درين,

صمدين قارا باليغيندان؛

قارا باليغلي باخيشيندان؛

ناغيل دا كي ماوي پري لردن؛

مندن!

..

..

سن دانيشدين سئوگي دن؛

دانيشديقجا آغيرلاشدي اورگين؛

بوغدو آرزيلاريمي!

هئچ بونو دويمادان,

قينادين سوكوتومو!

قينادين بوش اللريمي!

...

..

اينديسه,

آرتيق دينميرسن!

بلكه ده گئديرسن!

آنجاق سسين يوخ!

 

بلكه ده مني گؤزلورسن!

بلكه ده كسيليب اومودلرين مندن!

بلكه ده سن حاقليسان.....!

بلكه ده عشقي گؤزلورموش منيم بو آج بوغازيم!

ائئئئي.....

اللريم توپراغدان اؤزولدو!

 

گرچكدن گئديرسن؟؟

 

مني دينله مه دين؟؟

يا بو  آج بوغازدان  قاچيرسان؟

نئيسه!

آنجاق بو ايبهاملي دنيزلرين دالغالاري حئيران ائديرسه ده بيزي,

آآآآآي قارا باليق!

ايبهامسيز دنيزلر وار بو دونيادا!

گئديرسن,

گئت!

دنيزلر گؤزلويور سني!

ماوي پري يالان اولسادا,

سن گرچكسن قارا باليق؛

دنيزلر گؤزلويور سني......!

سميه يولقونلو

92/07/10

آرديني اوخو

"شيرتوو دونيا"

ŞİRTO DÜNYA

(Latincəsi ardında)

 

بو گئجه عوصيانا قالخير اورييم!

سنين آياقلارينين آرديندا!

سانكي اورييم باغلانير آياقلارينا,

تهليكه يه بويلانان كندينيزين دووارلاري,

اونلاري قوواركن!

و قارشيسيندا سريلن زميلر باغرينا توپورور,

آديملاريندا سن تك سيغينان قان خوره گين!

جوشولور منيم بئينيمده عوصيان,

 توپورولن قان خوره يين ايسرافينا!

سن زميلردن گئچيب داغلارا كؤچن زامان,

اورك, نوختالير دوشونجه مين دينج آللاهيني,

ساواشچي آياقلارينين سجده گاهينا دوغرو!

 

بو گئجه!

......

بو گئجه عصيانا قالخير اورييم!

سنين آياقلارينين آرديندا!

سانكي اورييم باغلانير آياقلارينا, سن زميلردن كئچيب, داغلارا كؤچن زامان!

كافر گؤزلردن تهليكه گليرسه سنه, مني تهليكه يه سالان سنين گؤزلرين!

بو گئجه دين سيز يوخولار زمي يوللاريندا كي داغلاري مندن آليرسا,  گؤزلرين مني باغيشلاماز!

قوي دوورلار كافره ديز چوكسون!

قوي بئلي سينسين, ديل قانماز نامازلارين قيبله گاهيندا!

من ايسه !

بو گئجه آياقلارين آنليمين مؤهورودور!

گؤزلرين عيبادتيمين شارابيدير!

 قيلياجايام عوصيان نامازي!

سحره تك!

كئفلي, كئفلي!

قان اولسون جانيمدا سئودان!

آي ساواشچي!

اوره گينين قوجامان گؤيلرينده اوچاركن,

 آييقليقدان ائله قورخورام,

كوكسوز دووارلارين كعبه سي جايديرير مني!

 لكه له نير سجاده مين اته يي!

آرتيق قيناماسين كيمسه مني,

اته ييمده, شيرتوو دونيانين شيرتوو لكه سين!

بير گئجه بير آغ پالتاردا,

او قدر آخيت گؤزلريندن اورييمه!

او قدر ايچيرت!

سحره ياخين,

قيريم كعبه لري,

بئجريم يئني دووار!

اوپوم آياقلاريني!

قيريليم آييقليقدان!

اؤلوم قلبينده!

كسين پالتاريم پاريلداياجاق,

سحرين شيرتووونا بولاشماسا!

شيرتو=كيرلي/ كثيف

نوختا= افسار

خورك (خوره يين)= يئمك (يئمه يين)

سميه يولقونلو 92/06/04





آرديني اوخو

بير صبح ائرته سي؛

آنقيرير ساعات قادينين قولاغينا!

و گونشين پارلاقلاري,

شان تك,

يوخوسوز گؤزلرين ائله شوخوملور,

سانكي آتاسينين هاي سسي ايدي او ساواشلي گئجه لرين سحري.......

....

...

واورك....

او گئجه لرده ازيلميش اينجه ليك لري ياشاركن, هر سحر نيسگيل توخومون اكمه غينه شوخوم لانميش....!

هر كئچن بيرين اكدي, دونيا بئجردي!

ايندي ايسه نيسگيل لر بوي آتيب.......!

.....

.......

بير صبح ائرته سي,

گؤزلويور اونو, اوتاغين بيجاغيندا, بير جوت گوبوت باشماق!

و گؤزلويور قاپي سينيرينن  داليندا "جامعه" آدلي بير قورد,   يانقي تنينين ديكليكلرين!

گونشين پارلاقلاري آلتيندا,

قارا لئچك, قارا ساچلاري بوغور؛

قارا اتك, حسرتلري؛

آنجاق,

 قارادير گونشين اوزون,

 ائركك گيبي گوبوت ياشييان قادينين اينجه دوشونجه سي...!!!!

سميه يولقونلو

آرديني اوخو

ساواشچي سئوگيليم!

منيم اوچون يوخ, قيلينجيين ايتيرتمك اوچون گل بير بورالارا!

اورييمين بوجاغينا!

بوردا هميشه يئرين بوشدور!

گلسن سه دوداقلارييان اؤپوش ايذني وئر!

يورقون گؤزلريله باخما بو دن دوشموش ساچلاريما!

اونلاري هئچ بزمه ديم....! باغيشلا....! آخي آياقلارييان جوراب توخوردوم!

دوداقلاريم ماتيك سيز! باغيشلا!  بيرده قيلينجيين سيليرديم!

سنده باغيشلانميشسان ايلك  ساواش پالتارين گئينده!

اوتانما تنيين قؤخوسوندان! آخي هئچ بير عطير ياراشمازدي او پالتارلارا!

 توپراق!

ساده جه توپراق!

يوباتما زاماني!

توت اليين, ايتيرت قيلينجي!

 آنجاق اللرين هئچ ساچلاريما توخونماسادا, او قورموش دوداقلارييان اؤپوش ايذني وئر!

قوي بئجردسين كيشي ليغيين و اك  تنيمين بوش تورپاغيندا بير ساواشچي توخومن!!!!

بير داها گئري دونونجه جان شيره مدن اونو بئجرديب ميدانا گؤندريم! 

مادام دونيانين آردي ساواش دير! ساواشچينين آردي اولمالي...!

........

ديل آچاندا وطن اويره ديم آنادان اونجه!

يول گئدينجه ساتيم گؤزگومو بير قيلينج آليم!

........

ساواشچي سئوگيليم!

هئچ سئويشمديك اگر, تانري ني باغيشلا!

آخي او قدر سئويشديك تورپاغلا,  آرتيق تورپاق قيسقاندي بيزي!

بير داها گلمه سن دا, گلمه!

قؤووش توپراغا!

قؤرو توپراغي!

من هر سني اؤزلوينده تورپاغلا سئويشه جم!

ساواشجي سئوگيليم, سئويرم سني........!!

سميه يولقونلو

آرديني اوخو

يئنه اللريم قانا بوياندي!

بير عوموردور احساس دوغوب, بوغورام!

ائي ائركك دونيا! آرتيق منه دوخونما!

 نه قارنيمدا سانجيا زور قاليب, نه اللريمده گوج!

سميه يولقونلو




آرديني اوخو